Kaj te czasy, jak u nos we kinach i wypożycalniach królowoł Shah Rukh Khan...

Niyby niy było to tak downo tymu, a widzicie - dzisioj, po bollywoodzkich hitach niy ma już ślodu. Żodyn dystrybutor już ich niy sprowadzo, niy kupicie sie ich na DiViDiczkach - szkoda... I bezto terozki na Bojkoblogu bydymy spóminać :)

W 2005 roku Amol Palekar nakryńcił pjykny, baśniowy film PAHELI. Jes to historio miłości śmjyrtelniczki i ducha (abo cornoksiynżnika), kiery zjawio sie u nij jako sobowtór jij chopa, kiery wyjechoł w interesach.

Jak to we Bollywoodzie, jes to... kómediowo-śpjwany kóstiumowy melodramat, łónczóny z tyjatrym kukiełkowym :)

Uwielbióm te ich michanie i mjyszanie roztómajtych gatunków! Ani chwila sie niy nudzicie, a co sie nałoglóndocie, to wasze. I niy idzie ino ło kolorowe hadry i wnyncza pałaców. Mocie tyż łokazjo bajsnóńć trocha ich zwyczajów i wierzyń!

Tukej tyż co chwila słyszy sie ło bogini Lakszmi, Ramie abo mogymy sie łobejrzeć, co to jes pudża i jak wyglóndo wyścig kameli.

Durch, jak żech paczoł na PAHELI, robił żech pauza na pilocie, i sznupoł na internecie, ło czym to w tym filmie godajóm. No ja, ale to ino tło. A przeca nojważniyjszo jes bojka!

Spómniany duch (gro go Shah Rukh Khan), kożde rano wycaruje pjyńć złotych mónet. Umi sie zmjyniać w ptoki, wjywiórki, a nawet wlyź do bukłoka, jak dżin do lampy, w czosie jednyj z czech prób, kierym poddowowajóm go na pustyni (czi próby - klasyczny, baśniowy motyw!).

Jes sam i morał - chwile z rodzinóm, tymi, kierym sie przaje sóm nojważniyjsze, a niy ino biznesy, interesy i robota.

No i jes humor. To, jak Khan robi za błozna jednego ujka, to durch sie przewijajóncy, kómiczny motyw tego filmu, kiery niy wloz do mojigo TOP TYN, a może powinyn...

Ale wjycie, takich filmów jes wjyncyj, kierych w prywatnym TOP TYN niy móm, a kiere w historii kina (abo raczyj gatunku) sóm jakoś tam ważne. Kiedyś tyż może i łó nich napisza. Ino że wtedy z TOP TYN zrobić sie może... ULUBIÓNO STÓWA :)

A na kóniec muzyczny ukozek z "Paheli":