Fandzolynie. Spróbować zawsze idzie, a czasym z takich roztómajtych "powtórek" wyłażóm naprowdy fajne rzecy.

Niydowno kupił żech sie w Czechach bojka "Šťastný smolař", co by szło przetumaczyć jako "Szczyńśliwy pechowiec".

To film, kiery nakryńciła ta sama ekipa, co czasła w 2005 roku kultowy dló mie "Anděl Páně".

"Výborná vánoční pohádka" - napisoł kieryś z czeskich recynzyntów ło tyj produkcje. No ja, wyborno, bożonarodzyniowo bojka to jes, a przi tym i łokazjo, coby kóknóńć, jak sie mo "milovaný český žánr" (ukochany czeski gatunek filmowy).

Mo sie kapitalnie, co powinno być tyż dobrym newsym (niósym!) dlo... wszyskich Ślónzoków.

"Naszą macierzą są Czechy" - napisoł niydowno Jerzy Ciurlok na Facebooku i musza Wóm pedzieć, że nojchyntniyj szczeliłbych sie tatułaż z tym cytatym :) Jynzyk, ludowo muzyka, kuchnia, bojki, historio, myntalnoś... - ło co w Czechach niy "zakopna", widza, wiela nos, Ślónzoków, z Czechami łónczy. Dyć jo już w dóma niy ino na czeskie kanały durch pacza (chytómy je w Tychach dziynki naziymnyj, cyfrowyj tv), ale i Biblia po czesku czytóm. I lepij mi to idzie, jak przedziyranie sie przez roztómajte polskie, biblijne archaizmy!

Chcecie wiyncyj poczytać ło zapómnianyj czesko-ślónskij spólnocie? Skołujcie sie szósto FABRYKA SILESIA (stróna kwartalnika jes tukej). Kapitalny numer. Polecóm! A terozki wracóm nazot do bojki ło czeskim smolorzu.

No ja, jyj główny bohatyr niy mo łatwego życio. Co sie niy chyci, to zesmoli. Nic mu sie niy udowo. A wszisko przez klóntwa jednyj wróżki.

Łojciec bohatyra jóm próbowoł łocyganić, to sie zymściła na Bogu ducha winnym potómku łoszusta. Tyn terozki tuło sie po świecie w towarzistwie Kdokoliva (abo po naszymu "Wtokolwieka"), ło kierym idzie chyba pedzieć, że to istny kuzyn baróna Münchhausyna (tyn sóm spryt i cygaństwo we krwi). A że gro go sóm Ivan Trojan (czeski Bogart!), jes na co popaczeć - dowo aktorski popis, jakich mało.

Niy gorzij radzi sie Jiří Dvořák jako Karlos. We spóminanym sam już "Anděl Páně" Trojan groł tytułowego anioła, a Dvořák diobła - tukej zaś grajóm bracików, ino, że ło tym, że sóm spokrewniyni, dowiedzóm sie dziypiyro (dźypjyro) we finale filmu.

Jes sam i piykno dziołcha, kiero cza wyratować z niyszczyńścio (Martina Zábranská), no i Jiřina Bohdalová - ikóna czeskich bojek/pohadek. Jak w kieryjś gro, mocie zarozki gwarancjo, coby na taki film paczeć.

Pechowiec i cygón przewyndrujóm pół świata, przeżijóm tysiónce przigód, coby na kóniec wszyscy zaś mogli żyć dugo i szczyńśliwie. I tak mo być.

A terozki łobejrzijcie sie zwiastun tyj bojki: