Czymu filmy łobejrzane we świynta sóm lepsze łod tych, kiere paczy sie bez cołki rok?

Tyż mocie takie wrażynie? Dyć czasym sie te filmy już wcześnij widziało. Powtórka z rozrywki. A i bezto, na Boże Narodzynie, kiere czasym nazywo sie u nos Godami, smakujóm lepij.

Ważne sóm tyż ich zorty, gatunki. Jo na przikłod łod wszyskich tych tzw. hollywoodzkich "christmas movies" wola bojki, baśnie abo to, na co Czechy godajóm vánoční pohádky. Mój ulubióny film tego typu to "Anděl Páně" z 2005 roku. Reżyserowoł go Jiří Strach, a w tytułowyj roli zagroł sie Ivan Trojan.

Trojan wcielił sie w Petrónelka - zasadniczego anioła, kiery jak zastympuje świyntego Pyjtra, to niy puści do nieba żodnego grzysznika. Żodnego! Nawet pobożno opatka niy wlezie, bo chocioż cołkie dorosłe życie dónżyła do świyntości, to przeca jak była małóm dziołszkóm zakośiła kajś kiedyś jednego bómbóna i to Petrónelkowi styknie. Był grzych, bydzie piekło. Ło raju zapómnij!

No ja, ino jakby tak kożdego łocyniać, to do nieba niy wlezie żodyn. Pónbóczek paczy na to, co jego anioł wyrobio i dużij niy może. Postanawio posłać go na ziymia, coby sie uświadómił, że tam naprowdy niy ma leko. Że świyntoś to niy jes tako prosto sprawa. Co ciekawe, pómogać Petrónelkowi mo w tym diobeł Uriasz.

No to idóm te dwa gizdy ze zaświatów na ziymia, kaj spotykajóm Dorotka - boroczka, kiero robi we zamkowyj kuchni za kopciuszka, a przi tym beznadziejnie kocho sie w ksiyńciu.

Beznadziejnie? Tak to pedzieć niy idzie. Dyć Petrónelek mo w niebie chody, a dziynki pómocy świyntyj Barbary, Any, czy Marcina, do sie zdziałać cuda.

Niy wiym, czy tyn film kiedyś lecioł w jakiś polskij telewizji. Jo móm czeskie DiViDiczko i w te świynta sie je zaś na bank puszcza. Kiery to już roz? To sie już ani niy spómna, bo to jedyn z moich kultowych filmów - takich, co to sie na nie paczy pora razy w roku, a w świynta...

W świynta mo sie z nich jeszcze wiynkszo uciecha, bo jak żech już pisoł, wtedy, jakimś cudym, smakujóm lepij.

No i mómy kolejny cud :) Cud Bożego Narodzynio. Nawet przi niby takich gupich filmach to wyłazi.

Cudnych świónt Wóm życza!