No, to dzisioj czas na łopis piyrszygo DiViDiczka, kiere żech przitaskoł z Prahy.

 

"Peklo s princeznou" wyreżyserowane przez Miloša Šmídmajera, to typowo czesko bojka-pohadka. Zanim princ i princezna (w tych rolach Jiří Mádl i Tereza Voříšková) na kóńcu hajtnóm sie i bydóm żyć dugo i szczyńśliwie, muszóm swoje przejś. A jes tego trocha, bo ło rynka ksiynżniczki staro sie niy wto inkszy, jak sóm Lucyfer.

 

Ja, ja... Czechy i ich ludowe bojki pełne sóm diobłów i dioblików. Czymu? A, bo sie godo, że jak doszło do stróncynio upadłych aniołów, to nojwiyncyj ich wleciało tam, kaj dzisioj jes czesko kotlina. Że niby łóne te kotlinowe zagłymbiynie zrobiły, jak jedyn po drugim rómboł ło ziymia i ślatywoł do piekła. Bezto tyż te pieróny nojczyńścij w Czechach na ziymia wyłażóm.

 

No a jak idzie spod ziymi wylyź, to idzie tyż przeca do piekła zlyź, co w czeskich bojkach jes bardzo czynstym motywym. Ale przeca niy ino w nich. Mity i

świynte łopowieści roztómajtych religii sóm tyż takich historii pełne, co ino dowodzi znanego nóm niy łod dzisioj pokrewiyństwa tego co sakralne, mityczne i baśniowe. Ale terozki już nazot do "Pekla s princeznou".

 

Niy ino Mádl i Voříšková grajóm w tyj bojce. Na ekranie idzie łobejrzeć cołko plejada czeskich herců a hereček, czyli aktorów i aktorek.

Petr Nárožný, Václav Postránecký, Zlata Adamovská, Roman Vojtek, Martin Stránský, Filip Blažek, Barbora Kodetová, Alžbeta Stanková, Miroslav Táborský, Jan Skopeček... Gro sam nawet sóm Miloš Forman, kiery wcielił sie w diobła Erlebuba!

 

Ale niy diobły tukej wygrajóm, ino miłoś, kieryj pómoże niy wto inny, jak... utopiec! Zagroł go Jiří Pecha, a wyglóndo we filmie tak:

Piykny, pra?

 

Bydziecie kiedy w Czechach, to sie porozglóndejcie za tóm płytóm DVD. Jak wto niy umi czeskigo, może sie tyn film łobejrzeć z angieskimi napisami-titulkami.

 

Polecóm - to jedna z fajniyjszych czeskich bojek, jakie żech w życiu widzioł.

 

A na kóniec trailer: