Pisoł żech niydowno na Wiara.pl, że Karlikowi z Kocyndra postawili w Katowicach pómnik.

Wto jeszcze ło tym niy słyszoł, tyn sie może doczytać tukej, a jo na bojka tego tydnio propónuja dzisioj "Diobła w biydaszybie", kierego Karlik - czyli Stanisław Ligóń - napisoł.

Tekst tyn znojdziecie w "Berach i bojkach ślónskich". Myśla, że tym, czym je dlo Poloków "Pan Tadeusz" abo Trylogia, tym sóm dlo Ślónzoków ligóniowe bery i bojki.

Udane sóm te jego utwory, niy ma co, a "Dioboł w biydaszybie" z borokiym Szatónym w roli głównyj bije wszelkie rekordy!

Już same miyjsce akcji, klimat tego łopowiodanio robióm swoje. Zima, kolyndnicy, makówki, moczka i miyndzywojynny Ślónsk - región w kierym "jedna gruba włazi na drugo", jak pisoł Ligóń.

Poczytejcie sie, posznupejcie za tóm knigóm. Niy tak downo tymu wznowiło jóm wydawnictwo Vesper.

Pyrsk! :)