Co za bojka! Science-fictión, lygyndy, Wiślany, dinozuary, smoki... - czego sam niy ma?!

Nakładym krakowskigo WAM-u ukozała sie niydowno fajnisto ksiónżeczka dlo bajtlów, kiero mo tytuł CIEŃ DAS-a. Po ślónsku cza by chyba pisać ło "ćyniu", ale może niy byda już sam wynokwioł, bo przeca tekst knigi jes pisany polszczyznóm.

Jego autorka to rozkochano w roztómajtych bojkach, baśniach i lygyndach Anna Karwińsko - profesorka socjologii, kiero nawet na swoich wykłodach godo sztudyntóm ło bojkach (umi ta tymatyka wykorzistać, wplyść w naukowy dyskurs!).

W knidze, ło kieryj dzisioj Wóm szkryflóm, Karwińsko zróbiła istny, bojkowy miszóng-maszóng. Na poczóntku niy wiymy, co sam jes realym, a co science-fictión? A może je to jaki dziwny syn? Abo jeszcze co inkszego - gra kómputerowo???

Interkómy, gazety stereowizyjne, chrónotery, ykrany pól siłowych... - nojwjynksze gadżeciorze, smartfóniorze i sóm Stanisław Lym by sie chyciły za gowa, wiela tukej tego jes! Mie sie nojbardzij podobo motyw przełażynio, wyłażynio...

Pamiyntocie może film Woody'igo Allyna "Purpurowo róża z Kairu"? Tam aktory złaziły z ykranów kinowych. W knidze CIEŃ DAS-a wyłażóm za to z roztómajtych e-ekranów.

Bohatyry tyj knigi to czi syncyska. Dwa gizdy z prziszłości i jedyn z czosów spółczesnych, kierzy spotykajóm sie... No ja, kaj?

Niyby to downe, downe czasy Wiślan, ale sóm sam i roztómajte cwergi, skrzoty, bezto wto wiy, czy niy jes to przipadkiym narniowaty świot baśni. Abo może wyłobraźnia jednygo synka, kiery sie naczytoł lygynd ło smoku Wawelskim?

No ja, jo Wóm tego niy powiym. Przeczytejcie sie lepij sami! :)

***

Jak wjycie, miołek dlo Wos czi ygzymplarze tyj knigi, do kierych dociepnół żech tyż mjyndzy inkszymi treski (koszulki) portalu Wiara.pl.

Zadanie kónkursowe bóło takie: mieliście mi napisać, jaki jes Wasz ulubióny film, abo kniga z gatunku science-fictión. Trocha tych mail żech dostoł, królowoł Tolkiyn, Lym, "Harry Potter" i "Gwiezdne Wojny", a nagrody wylosowały czi dziołchy: 

Małgorzata Drągowska z Augustowa, Sandra Szelejewska z Katowic i Beata Hoczyk ze Siymianowic Ślónskich

Gratuluja, jeszcze dzisioj zaniesa pakiety do wysyłki.